Kinderwunsch 2

Hallo zäme

bi au wiedermol dainne. Binchen und Sterndli ich drück eu so öppis vo Dumme, dass es klappet dä Monet. Hoffe ihr gänd ganz viel Zyt zum üebe gha. Ich mögt's eu soooooo gönne!!! Ihr wäret ja denn bi de erste im 2014.

Melone, mir tuet das sooo leid. Cha nid verstoh, dass das so lang goht. Ich hoffe, das chunnt alles gli in Ornig mit dine gsundheitliche Problem und das die 2. OP gli agsetzt wärde chan. Isch mängisch scho verruckt, wie eis ds andere git. Ich dänk fescht a di, dass alles gli wieder guet isch!

Wünsch eu ganz es schöns Wucheänd, au wenn's so verrägnet isch.
glg

Hoi sascha, schön wieder mal vo dir lese!
Wie gots dir?
Danke, hoffets so das de monet klapet hät! Händ schön chöne üebe de monet und de claerbluemonitor hät sogar de es azeigt!
Sterndli de chueche isch sicher mega gsi! Gäl für üsi schätz macht mer de ufwand gern an geburi, händ amigs au es festli gmacht und grilliert!
De schnee höt hät mi grad chli gstresst, aber isch ja erst april und nächst wuche söts ja scho wieder besser werde!
Bin den scho froh wen me de am chline nüm so viel muen a lege zum use goh!

Lg

hallo

Sascha so schön vo dir zlese.. Aber säg doch wiä gohts au dir?
I danke dir für di liäbe wort.. Werd am dienstag wider zu de husärztin go und den au de kinderwunsch aspreche i hoffe si wird mi positiv bestärke und nöd wider immer de satz ghöre müeße vowege beßer nochli warte! Ha gest e richtigs tüf gha.. Ha mir echt überleit wiä i echt de kiwu abstelle cha und di 2.op si loh.. Aber jetzt hani e nacht drüber gschlofe und i ha scho so viel mitgmacht und kämpft.. I cha und will nöd uf es 2.kind verzichte! I würs sganz lebe lang bereue! Und das empfehli jedem.. Kämpfet für euen traum!

Melone find schön das din wunsch ned uf gisch und defür kämpfsch! Hoffe das dini fa uf dich i got und din wunsch verstoht!
Druck di!
Lg

hoi binchen

I danke dir.. I sägs jetzt halt glich emol.. I weiß sitem mäntig das i jetzt au no diabetik ha.. Und da macht mir halt scho au sorge wegere zuekünftige schwangerschaft.. Ha angst das den au sbaby drunder liedet und nebetbi e 4kg plus baby wird macht mir au angst weg de geburt!

Ou nei melone das au no tuet mir leid! Muesch tablette nä oder insulin sprütze? Klar gits risike mit dere diagnose schwanger si aber hötzutags chan mer ja de diabetes guet i stelle!

binchen e tablete mueni neh und viel go kontroliere luege wiä min körper druf reagiert.. Ha ebe uf de bilagspackigzettel glese das mer inere ss sofort uf insulin wechsle mue und i find da chli kraß.. Ha den grad au no am gliche tag im tv ghört das binere ssdiabetis sbaby hüfig e problem mitem herz uftritt.. Ha leider nöd de ganz bitrag mitübercho zspot igschaltet.. ufjedefal het mi da sehr abgschreckt! Drum chumi mir egoistisch vor immerno e kind zwölle! I hoffe me cha dem vorbüge wens mer jo scho im vorus vom diabetis weiß!

Drucke dir dume das de monet igschlage het!

hallo zäme...

ja, me git alles, dass de geburtstag en hammer tag wird... ha sit 2wuche voll de stress... hochziite, geburtstag, taufi... zum üebe hani drum nid vill ziit gha... eimal... wenns de monet nid klappet isch au ok... ich mache mir kein stress... ich hetts gern jetzt, aber wenns d'natur anders vorgseh het, isches halt ebe anders... und ebe, ich bin jetzt 2wuche umegsecklet und han drum au nid riesig dra denkt... ich merkes denn i 9tag obi schwanger bin oder nid...

melone: das isch en mega seich... mini schwögerin het au ssdiabetes gha... die chliini isch putzmunter uf d'welt cho... ich glaube au mitere normale diabetes isch das locker möglich... muesch eifach gwüssi rahmebedingige iihalte... vermuetli ide ernährig au vill strenger sii, wie inere ss ohni diabetes... ich glaube ide hütige ziit chame sehr vill scho gnau kontrolliere...

Melone danke dir, ja wär so schön wens klapet hätti!
Ich denke au wen mer vo afang a mit ernährig und regelmässiger kontrolle
Lueget den söt anere ss nüt im wäg stoh!

Sterndli au mit wenig bs chan mer ss werde! Den drucki glich mal dumme, wer weiss.....!

Dörf jetzt au abwarte und hoffe das klapet hät, 3 mai weissi den au meh.

Lg

i danke eu da bestärkt mi das es richtig isch zum kämpfe! Und jo i mue mega uf ernährig luege.. Salat und gmüeß isch seinzig wo i ohni schlechts gwüße eße dörf..

hey melone... au gmües sind u fein und es gaht nüt überne feine knackige salat... nüsslisalat, iisbergsalat... super lecker... oder eifach kochts gmües... bim fleisch isches halt ohni marinade und ketchup isch sowiit ich weiss eis vo de schlimmschte lebensmittel... aber du packsch das!!! ich han endi 1.ss müesse vill fleisch esse wegem iise... ich han nid so gern fleisch... aber ich has gschafft... für die chliine zwergli machtme sooo vill und ich bin überzoge, dass du das für ds 2te chind schaffsch!!!!!! und zur unterstützig sind mir ja da... oder ihr liebe da im forum?!?

ja, ich warte jetzt mal ab... so wieni am samschtig und sunntig gspunne han, chas durchus sii... aber da ich ide akupunktur bin, chas ebe au e energieblockade sii, wos glöst het... ich nimes jetzt vorzue...

guete morge sterndli

Danke dir echt liäb.. I ha au gern gmüeß oder salat (Voralem den wens heiß isch!) aber den immer nur da.. Langwilig und koche mueni jo glich! bi au kein fleischfan.. Aber i liäbe pasta.. Kohlehydrat sind öpis vom schlimmste! Und i liäbe ovi.. Au da hani gstriche! Hoffe de wert seg bitz abe mue morn wider kontroliere!

Im übrige min sohn isch au i dem monet entstande wo mir nu 1mol bs gha hend.. Bi total baff gsi! Druck der düme!

mir hend ebe am samschtig es hochziit gha und mini chlii isch chrank worde am fritig... ds erschte mal chrank...drum hani uf ds hochziit verzichtet und wel min maa trauzüüge gsi isch, isch er gange... ja logisch, eigentlich... aber am abig am 10i bini iifersüchtig worde, han agfange hüüle... ich bin suscht de typ wo seit: ja, gang ruhig... und denn bini entspannt dihei, cha schlafe... aber a dem samschtig... ich bin umetigeret wiene irri... ha bis am morge am 3 nid gschlafe, im bett hani nid chönne schlafe... han denn ufem sofa pennt... mega müehsam isches gsi... und so bini suscht würkli nid... jetzt entweder bini so gstresst gsi, dassi nid ha chönne debii sii, dass die chliini chrank und liecht müehsam gsi isch, dass es e frau am hochziit gha het woni nid übere wäg troue oder ich bin schwanger und han drum so tah... oder ebe energiestau wo sich dur d'akupunktur glöst het... es chan so vill sii, aber verstande hani mi selber nid...

ja, teigware, brot... isch vill wo nid gsund isch... tuen abkläre, obs dörfisch esse, wenns selber machsch... denn hets sicher weniger zucker dinne... und ebe gmües isch würkli öpis feins... es isch sicher astrengend so... aber du machsches ja für ds chind... denn hesch en grund... und mal en ussetzer dörf au denn sii... mini stiefmam het sicher no es rezept für chueche wo für diabetiker geignet isch... ich chan sie sucht mal fröge... und muesch mal ide migros luege, det sind u vill sache agschribe mit für diabetiker geeignet... mini schwe schwört uf ebli... villicht dörfsch das esse... muesch dir eifach bitz pasta-ersatz sueche... denn hesch au nid das verluscht-gfühl... bevor ich schwanger worde bin, bini immer go gleitschirm flüüge und klettere... und ide ss söttsch das ja nüm... denn bini amigs eifach bitz go zueluege... so bini debi gsi, aber für mich und ds chind imne gsunde mass... isch nid ds gliiche, aber ich has nid ganz müesse abgeh...

Hallo zäme

ohje, melone, so e Diagnose isch echt zvil, tuet mir wahnsinnig leid! Jetzt muesch dich no damit usenand setze. Muess es immer so liebi Mönsche träffe?!? Ich hoffe, du finsch Kraft zum witer kämpfe, gib nid uf, susch bisch einisch reuig.

Ich ha grad e Kollegin wo ss isch. Sie isch karrieremässig sehr guet unterwägs gsi. Denn het si Diagnose MS übercho. Schaffet hüt no 30%. Hoffe sehr dass ihre Körper die ss guet wegsteckt und sie's schafft ds Baby betreue, wenn en Schub chunnt.

Binchen und Sterndli, hoffe sehr, es klappet dä Monet. Hui sterndli, mängisch brönnts eifach dure mit eim. Isch müesam und mi verstoht sich sälber nid.

Ich han chli es schlächts Gwüsse eu das säge, ich han am Samstig positiv testet. Eigentlich freu i mi meeeeeeeeeeeeeega. Han aber au Angst, ha ja s'letscht ir 6. Wuche verlore. Chan no so viel passiere... Drucket mir Dumme!

Wünsch eu ganz en schöne Obe

He sascha so toll, gratuliere! Froi mi u für dich, mag dir vo herze göne! Hoffe das alles guet got und chline würmli bi dir blibt damal! Isch ja verständlich das nach sonere erfahrig angst häsch, aber freud überwiegt ja sicher!
Lg