Kinderwunsch 2

ou puenggeli, han am Mittwuch au Rägesache gsuecht und denn 3 paar andere Schueh kauft für de Gross , ich finde ja Rägestifel so öppis vo blöd, aber ab und zue söll er ja au chönne glünggele....
Härzig sind ihr när grad hei gloffe - au wenns viel Zyt brucht - aber es macht doch Freud...

Melone, ich chann dir nahfühle, vor dere Entscheidig bini au gstande KS oder nöd. Im Nachhinein würd ich KS mache, uf dr andere Site isch es halt scho es anders Erläbnis e natürlichi Geburt. Und min FA het au gmeint ich sig viel besser dra, trotz de schwäre Verletzige, als mit eme KS. Aber ich darf gar nid dra dänke, dass de Chli d Nabelschnur um de Hals gha het und sini Herztön immer wieder zämegheit sind. Er hätte kei Chance gha, will si händ mir ja kei Insufion me chönne stecke, wie hättes da sölle en KS mache.... Los eifach uf din Buuch und vertrau druf, denn wird alles guet cho.

Peyton häsch testet?
Dutchy gohts ar Anouk besser?
Sterndli, luegsch no ab und zue do ine? Wie gohts de Emily?

Bi eus gahts immer no super, ich han die Zyt mit mine zwei Buebe soooo gnosse. Nöchst Wuche fang ich wieder a schaffe. De Chli chunnt mit und dr Gross dörf wieder ei Tag zum Grossi. :-(
De Chli hät scho sehr wachi Momänt und probiert Töndli vo sich gäh. De KIA isch sehr zfriede mit em, er het i eim Monet 900 Gramm zuegno und 5 cm gwachse und isch jetzt im Durchschnitt.
Und de Gross wott unbedingt lerne läse, er übt Buechstabe wie e Wilde. Ich findes zfrüeh, aber wenn dä sich öppis in Chopf gsetzt hätt...ganz de Papi...

jo gel sascha aber woher söll mer wüsse das öpis nöd stimme chönti? demfal hends dir no gar kein zuegang gleit gha für e infusion?? so underschiedlich chans ablaufe.. wos bi mir gwüsst hend mi lönds nüm hai händs mir sofort en zuegang gstoche fals schnell go mue.. hans jo aber nöd brucht gha!!
wünsch dir demfal en guete arbeits start am mäntig!!
du min sohn kennt scho jede buchstabe bevor er 2johr alt gsi isch!! er het immer gfrogt wiä au er jetzt immer überal frogt wa stoht do.. würd also au gern scho lese chöne.. tuet au immer so als chönt ers.. nimmt e buech und verzellt es gschichtli.. isch doch schön wens intresse dra hend unds nöd uf es muess da jetzt chöne uselauft!!

Puenggeli,jööö,hesch de ts wägeli garnid drbi gha?mues zue gäh,ha de nidso geduld wie du ;)
D anouk louft o i all richtige,je nachdäm wie das si grad ts glichgwicht het und wesi o nume irgend es mini steindli gseht,hockt si ab und stopfts iz muul,da chunsch würkli niene härä
Aber has no ä gueti idee gfunde vo dir,ga iz o vil ohni wägeli und luege wie witt dasmer chöme!
Ig finde d rägästifeli super süess

Sascha,ig findes krass wie du dini geburt hesch müesse erläbä,es hetmer also schochli ts dänkä gäh!zum glück geits öich beidne guet!isch wie du seisch würklich nid sälbverständlich leider!
Warum heisi äch das nid gseh dases es stärnguckerli isch,oder dräie die sich so während dr geburt??
Si nid nöime beidi buebe stärnguckerli gsi??
Wünscheder o ganz ä guete start bim schaffä!isch nid ganz eifach dr afang!

Danke,ar anouk geits wider guet!sisch gstöhrt was die inebigt im momänt,si isch am ufhole ;)

Ä schöne suntig

Melone, si händ scho e Zuegang gleit gha, aber de isch verstopft gsi, drum händs au ke Schmerzmittel chönne gäh. Was das für Problem geh hät, wenns Komplikatione gä hetti, hani zum Glück dört nid begriffe....

Dutchy, ohje, hoffe du chasch mi Gschicht chli ablege, bis bi dir ä witeri Geburt asteit....Das mit de Stärnguckerli hani mi ou scho gfrogt. Ja, si beidi Buebe gsi. Dr Chli isch meistens uf dr Site gläge bir Kontrolle und es het au gheisse, dass es Sternguckerli eher sälte isch. Wenn sich dr Leon den dräit het, weiss i nid, im Spital isch kei US meh gmacht worde und min FA hets denn gspürt - 5 Minute vor dr Geburt - denn ha ichs scho gwüsst.... Im nachhinein hets denn gheisse, chönnt au a mim Becki liege, dass sich d Chind dreie.

Morn hani Nachkontrolle bim FA. Bi gspannt was er seit, ha immer no liechti Bluetige und die sötte höre, het Hebamme gmeint. er wott anschienend no mol mit mir über die traumatischi Geburt rede, het mir si Frau gseit. Isch scho komisch, ich würd bime 3. Chind ganz klar KS wölle. Aber jetzt nach 5 Wuche, hanis scho fasch chli vergässe...

Sind ihr hüt au so lang dusse gsi, isch jo soooo schön gsi.

sascha bi echt immerno ganz erliechteret das als doch no guet cho isch.. e richtigs wunder!! und weg de bluetig mach dir kei sorge.. i ha 6wuche bluetig gha noch de geburt!!

Juhuuu sit gester lauft dMelissa freiwillig ohne min Finger zhebe . Ha soooo freud und sie au! Und dur ihres Training gheit sie au fast niä um! Me mues ja eh öppis mit dä Chind mache. Aso wieso nid 50 Minute heilaufe. Hauptsach di Chli hät freud dra . Doch dä Wage hani debi gha. Bi vom Poste hei gloffe.

Sascha, din Grosse hät sicher au freud ade neue Schueh gha! Ich ha au nid so gärn Gummistiefel a, ha mir aber au kauft wenn ich mit dä Chline use mues. De chani au dur dGlünge laufe . Scho wieder go schaffe?! Respäkt! Häsch en guete Start gha? Und so viel hät dä Chli zuegnoh. Dini Milch mues super si!

Dutchy, das mit em Steinli is Muul näh känn ich au. Oder me cha au no Blättli abzupfe usw...

KS, wenns kei Infusion meh chönd lege, aber sChind gebore wärde mues, denn gits ä Vollnarkose. Wo ich im Spital iträtte bi, hends mir als ersts en Zuegang gleit und Bluteabgnoh zum Bluetgruppe bestimme, falls ich Bluet brüchti.

Guete Obe Ladys

Juhuuu, puenggeli, ich freu mi grat mit dir das d Melissa lauft. Das muess e tolls erläbnis si wenn me das s erste mol gseht.

Sascha, nei ich ha nunig testet, ich wart jetzt glich no es paar Dag. Hät aber am Mäntig mini Däg söte becho...
Cha jo aber au sie das es sich eifach au nunig ipäntlet het,isch jo letzsch monet s erst mol gsi dasi se becho ha.

Tuet mir leid dasi nüm so viel din gsi bi. Ha aber viel ztue ka und letscht Wuche hani no Geburtstag ka und unerwartet viel bsuech becho. Denn het au no mi schwester Geb. ka. Und wies halt so isch den vergoht d Zyt so schnäll. Am Fritig hani no d bestädigung becho dasi erst im Septämber cha avo schaffe, ha drum agfrogt öb ich dr unbezahlti Urlaub cha verlängere lo. Juhuu und sie hänts bestädingt.
Am Sunntig inere Wuche gömer für fast 4 Wuche ind Ferie. Es graut mir jetzt scho vor dr Fahrt. Mir göhn mitem Auto wil mir unseri Hünd au mitnäme. Me het ca 24 Stund und ich weiss nit wie das söll go mit dr Peyton. Sie fahrt jo scho nit gärn churzstregene. Mir wärde sicher zobe abfahre so das mir scho mol einigi Stund chönne durefahre.
Aber freue tue ich mi einewäg risig!!

Uh ja, Peyton, das isch würkli super gsi. Aber isch fies gsi, ich bi am schaffe gsi und min Maa diheime. Aber er hät mir es Video gschickt .
Hoffe dini Mens loht no lang uf sich warte!
Herzlichi Gratulation zum Geburi! Schöne Tag gha?
Super, chasch no länger dihei si! So toll!!!
Wo ane gohts denn id Ferie?

Danke,ich ha e schöne Dag ka. Familie und Fründe sin mi cho bsueche es isch richtig gmietlich gsi.
Mir göhn uf Schwede, wie jedes Joor, do mir es Hüüsli dört hän. Freu mi scho jetzt uf die Ruhe und kei Stress...

Oh so schön, Schwede! Det chames sicher gnüsse!

Ich han au grad Ferie buecht. Mir gönd ei Wuche uf Italie, ide Nöchi vo Venedig ufen Campingplatz ines Bungalow diräkt am Strand. Ha grad so freud!

puenggeli so schön het si freud am laufe übercho..

peyton wünsch eu den schöni feriä.. hoffe goht besser mitem lange autofahre als es erwartisch !!

wiä gohts eu suscht alne so??

i bi am mitwuch bi de fa gsi.. de chlini het recht zuegnoh.. 700gr i 3wuche.. isch jetzt scho fast 2kg!! isch also alles guet und im normalberich!! ctg hani au gmacht will si mi jo jetzt ide fraueklinik ameldet!! zeigt no kei wehe a!!

melone, ez chunnsch de glich dis 4 kg Baby über, wenn er so wiiter zuenimt . Sind ihr euch ide Nämensfrog scho einig worde?

puenggeli i denke nöd.. sind no 7wuche und wen er i 3wuche 700 gr zuenimmt wär er öpe 3 1/2kg!!
sind nonig wieter ide namenssuechi!!

Puenggeli,juhu iz isches also eso witt und d melissa louft o ganz unabhängig!!was fürne meilestei...isch zwar schochli gemein,ussgrächnet wen du nid dert bisch

Melone,super isch als guet!i dänke o nid daser bis den no zumne 4kilo baby wird,dä wird doch sicher wunderbar im durchschnitt si
Wiso hesch de scho as ctg müesse,wägem frouespital??chume nid ganz drus?!
Hesch das thema wäge diabetes und ks agsproche bim fa?
Bi gspannt was dä meint?!

Peyton,wow schwede..sicher schön!magi öich vo härzä gönnä!!tja das mitem fahre isch immer sone sach,mi weiss ja vorhär nid wie dases de schlussändlich usechunt!hoffe es chunnt guet,cha dini bedänke sehr guet verstah!
Wievil hünd heit de dir und was fürne rasse heisi?
Hesch unterdesse dini täg übercho?
Ig hasä sit hüt,genau vier wuche nach absetze voder pille!
Also mi zyklus pändlet sich rächt problemlos wider i!

Schöns weekend

melone: klar wirds keis 4 kg Baby. So schön im Durchschnitt wird er si. Hesch nid langsam chli Angst, dass ihr kein Name finde wärded? Sind ihr wenigstens bim Zimmer scho wiiter?

Tja, chaschs ja nid ussueche. Aber diä erste Schrittli elei hät sie ja gmacht wo mir beidi dihei gsi sind. Am Znacht choche .