Kinderwunsch 2

guete morge!!

peyton schön isch als guet mit dim buchbewohner! isch wohl no bitz schüch.. drucke düme für de nögst undersuech!!

dutchy freut mi zghöre das di langsam besser fühlsch und di immer me freue tuesch!!

julian isch de name gsi uf de lischte!! hend den am schluss no überleit öb julian oder julien.. aber jo weisch jo für was mir üs entschiede hend.. weiss aber gar nüm de usschlagendi grund! hmm.. mitlerwile hani mi dra gwöhnt!! eigentli scho komisch es git doch sooo viiiiel näme uf de welt und am schluss het mer nume eine oder zwei uf de lischte.. drum mach dir kei sorge ihr hend jo würkli no viel zit und ihr werdet euen name bestimmt no finde.. und wer weiss viellicht brucheder jo gar keine füren bueb!!

üs gohts würkli guet.. bi eifach amel chli im stress weni 2kind muess parat mache zum usego!! oder wen de chli hunger het wen i am koche bi.. freu mi wen er den mitesse cha..
so muess jetzt afange kind richte.. min grosse muess in kiga!!

Guete Morge

Melone, isch hüt dr erst Dag für in Kiga?

Dutchy, meinsch du dr Bluettest wo me sälber muess zahle? Falls jo, nei dä hani nit mache lo. Do mir in dr Fam niemerts hän und vom alter här bini jo au nunig in dr Risikogruppe. Ha eifach d Nackefalte mässe loh und do gisch jo au chli Bluet mit. Do hani s Resuldat scho und das isch bi 1 : 1366 also ganz klei. Ich wüssti au gar nit was ich würd mache wenn me jetzt scho wüsst das s Kind e behinderig hät. Find das e mega schwere etscheid und drum machi au keini witere Tests. Ich bätt eifach das es Gsund isch und alles guet.
Bim vorletschte US het sich s Kind mega bewegt das hani au no nie gseh do d Peyton immer ganz e ruhigi im Buch gsi isch bi de US untersüech ( düfür jetzt e mega wirbelwind ). Bi letschte US hets gschlofe und het sich erst gege schluss chli bewegt.
Dr Peyton gohts guet sie isch wieder am Zahne aber das mol ischs nit so schlimm obwohl grat vier chöme. Wen die den duse sin was nüm so lang goht het sie den scho zwölf... Zwei Backezähn het sie jetzt au und das mergsch wie sie jetzt scho besser cha sache verbisse. JO und du seischs mit drvo springe, sie haldet mi ganz schön uf drabb. Ha scho gseit hoffentlich wird s zweite e schloftablette.
Aber es macht spass, jetzt cha sie sich doch scho mit geschte, mimike und "wörtli" usdrucke was sie wil. Isch mega härzig und mi dungts jede oder fast jede Dag chunnt öbis mehr drzue.

In wellere Wuche bisch jetzt?

genau peyton er het zum erste mol kiga gha!! isch guet gange hoffe klappet wieterhin guet!!

Uhiii, bisch nit mega ufgregt gsi? Wieder e grosse Schritt ind sälbständigkeit vomene kleine Menschli. Sicher mega spanend. Ich hoff au das er gärn goht und spass dra het.

doch irgendwiä bini sehr nervös gsi.. me macht sich doch immer irgendwiä sorge wen was neus afangt.. zbsp brucht er halt nochli hilf bim jagge alege.. händ ihn halt zfest verwöhnt hebs doch automatisch ihm immer ane.. ha mi halt gfrogt öbs echt nochli helfed oder scho afanget druck mache zums selber mache oder öb er echt sich au getraut zum froge wen er hilf brucht oder so sache fangt mer sich uf eimol a froge..

Ich chas mir chli vorstelle das du sicher nervöser gsi bisch als Elias. ( gäll er heisst Elias ?? )
Ah so gedanke kömme den eim, so wit überlegt me zerst gar nit gäll. Aber ich hoff doch das die Kindergärtnerine luege das sie chönne hälfe und s au mache. In däm alter chame jo nit verlange das sie scho alles chönne.
Gohsch du wieder go schaffe wen dr Julian chli grösser isch oder dörfsch dehei blibe bis er au in Kika chunt?

genau elias heisst er.. hüt isch er ganz nass gsi(isch mir erst de hai ufgfalle) hose als heti si us de wäschmaschine use gnoh und sogar underhose nass!! kind heget ihn ide pause verusse agsprützt.. er het regehose döte aber het ihm niämert gseit er söll si alege und luege das denand nöd asprützed machets wohl au nöd.. bi echt hässig gsi.. de het en vater au no sini tochter gsuecht.. diä müend doch das abkläre weles kind abgholt wird und weles scho elei hei lauft und bi welne kind scho gar nöd möglich isch wills zwiet weg wohnet.. me dörf nöd vergesse diä sind doch ali immerno chli!!

jo de julian wird mit 2 ume au id krippe go und den mol luege öbi grad was finde für diä 2täg.. mue mir den au no e lösig finde wiä i da mache söll mite schuelferiä.. bi de arbeit het mer jo nöd soviel zguet und das i den jedesmol unbezahlt neh cha isch jo au nöd sicher und eifach zum finde.. wiä mached ihr den das??

Oh was!! Das foht jo scho guet a. Und sie hän dr Elias eifach in de nasse Kleider loh wieder spiele nach dr Pause? Das goht jo wohl garnit...
Ich hoff sie häns jetzt chli besser im Griff. Sins den vieli Kinder?

Ich wird im Sep wieder go schaffe. Hihi eifach so lang das es goht. Und den wird ich sicher es zytli dehei sii. Bi uns im Gschäft gits es Mami die isch 50% agstellt aber sie schaft mehr in dr Wuche und so cha sie den immer wenn Schuelferie sin dehei blibe. Aber ebe do muess dr Arbeitgäber mitmache. Und unsere Chef isch sehr familiär. Do chöne mir glücklich sii. Ich bi e Joor dehei gsi uf unbezahlt, ha wiederhin e Arbeitsvertrag. Wies nachem zeite Kind wird sii muess me den luege.

hoi peyton wiä gohts dir?

nei isch en chline kiga! hüt heter au irgendwiä de finger verletzt und er heg au brüelet aber ebe sowas erfahri nöd vo ihre und si hends au nöd verarztet.. nöd mol es pflästerli.. frog mi öb das so normal isch wiä diä das handhabet..

jo de häsch glück mit dim gschäft.. findet mer au nöd oft.. verstohs au.. wen jedes mami al feriä fehle würd isch sicher nöd eifach füre firma! arbeit hets jo trotzdem!

hüt händ mir 2monatskontrolle gha! julian isch jetzt 5690gr und 58cm.. elias isch mit 2mönet 5670 und 58,5cm gsi.. finds echt witzig wils jo doch es ganz anders startgwicht gha hend!!

Danke eigentlich gohts guet user dasi wieder vermehrt e harte Buch ha. :-(

Aber das chas jo nit sii, wiso sage sie so öbis nit? Isch das normal?? Heschs sie scho mol druf a gsproche?
Sehr guet den tuet sich dr Julian jo ganz normal entwickle das isch den schön. Do gseht me wieder mol das es nüt zbetüte het wen eins chli schwerer uf d wält chunnt das es den immer so muess si. d Peyton isch zb bir Geburt 50cm und 3500g gsi. Also voll dr Durchschnitte aber den chum an dr Bruscht het sie inere Wuche scho wieder mehr als s Geburtsgwicht zuegno und isch bis ca 6 monet immer mitem gwicht über dr Kurve gsi also e chleins möbsli. Nachdäm sie aber het avo krabble mit 6 monet het sich das radikal gänderet und jetzt isch sie wieder im normale bereich. Sogar eher e fiini.

Wie gohts de andere Ladys so?

nei druf agsproche hani nonig.. bi immer chli zrugghaltend bis mi den verjagt!!

genau min grosse wiä dini chli 3570gr bide geburt und bim spitolustritt het ers scho wieder druf gha!! mini jungs sind beidi jo au im obere bericht ide gwichtsklass.. jetzt isch min grosse mit 4ri 105,5 cm um 18 kg also gwichtmässig knapp überem durchschnitt und würkli nöd dick!! min grosse het aber niä krabblet!! isch mit 10mönet glofe!! mit jöhrig isch er scho am fuessball hineno grennt wo grösseri kind am spiele gsi sind.. het so genial usgseh!!

Hoi zämme

Sin ihr das Wätter au am gniesse? Herlich oder?

Hoff es goht allne guet?

Melone: wie gohts im Kiga, hoff isch nüt me vorgfalle?

Kurz zu mir: Mitem Baby isch alles guet und es git sehr worschinlich es Meidli. Ich freu mi aber mi Maa het no chli mie. Also er freut sich natürlich scho aber er hät doch sooo gärn e Bueb ka. Ich jo afangs au aber wie länger ich drüber nochdänk um so mehr freud hani amene meidli. wen sie so toll wird wie d Peyton den nimmi no 100 stk.
Leider ha ich mi scho drei Wuche miesse lo krank schriebe do ich so blödi vorwehe ha und e lichte wehestoper muess nä. Jetzt wenn alles guet isch fangi ändi Sep wieder afo schaffe. gang no e ehre rundi go dreie.

oh je peyton jetzt scho wehestopper.. weli wuche bisch jetzt?? hoffe chasch es ruhig neh damits no laaang warte tuet!!

oh schön 2maitli.. i verstohne din ma würkli sehr guet!! goht mir au chli so.. ha jo au denkt wird es maitli wills e total anderi ss gsi isch.. würd natürli niä mini jungs itusche wölle den i liäb si überals!! aber denke ab und zue no dra wiä schön es wär no es maitli zha, also es 3kind..

jo de kiga lauft guet.. es gfallt ihm sehr und gottseidank hets au keini vorfäll me geh!!

wetter gnüsse isch jo jetzt au wieder verbi und i ha müese druf verzichte! bi vore wuche ufem weg zum kiga umgheit.. mitem chline ide tragi.. ha den chöne mi so uffange und dreie das am chline nüt gmacht het.. leider ha ich aber min fuess verletzt(blueterguss).. also isch total ufgschwulle und 3täg lang hani nume umegumpe chöne.. isch mittlerwile einiges besser aber gar nonig guet.. isch also immerno gschwule mit blaue flecke und en krampf hani au im fuess!! naja arzt seit goht öpe 3wuche bis i wieder normal laufe cha.. söt soviel wiä mögli fuess ue hebe.. chli schwierig mit 2kind und vom hushalt dörfi scho gar nöd afange verzelle..

Hoi zämä,
Ich mälde mich o ändlich widermal...läck wie doch die zit vergeit,mag mängisch sälber fasch nid nachä

Ui melone,iz geit also dr elias i chindergarte!schön gfallts ihm eso,das isch doch d houbtsach und zum glück isch jetz o nüt me negativs passiert!i dänke das isch rächt schwirig...sisch doch süsch scho ä riise schritt die chline plötzlich eifach eso wäg ts gäh..im wüssä das si meh und meh unabhängig wärde!wär absolut nid bereitmomentan...aber drum geits ja no 2 jahr bi üs
Wie geits mit dim fuess??sone seich,zum glück hets am chline nüt gmacht!!ja säg nüt...still ha ,mit zwöi so chline..tönt scho ender schwirig!

Peyton,härzliche glückwunsch zum meiteli..jööö,isch doch schön !wie geits dir süsch eso?hesch immerno so vorwehe?gspührschse scho guet dini chlini?

Churz zu mir,mir geits bländend!bi jetz ir 20ssw und cha mini zwöiti ss eso richtig gniesse momentan...ha überhoubts keni beschwärde,(usserd villicht dä wahnsinnig appetit woni ha,chönt vom morge ,bis am abe nume ässä j)
Nach denä würklich schlimme erschte drei monet,bini das iz richtig am gniesse
Bi am mäntig ts letschte mal bim fa gsi..es gseht als sehr guet us und o mir erwarte üsi zwöiti prinzässin
Mir fröie üs beidi riisig uf die chlini!mi maa het vo afang a ts gfüehl gha es git wider es meitli und ich irgendwie o...für üs stimmts eso

Calamita,bisch ab und zue no i däm forum?wie geits dir und dine girls?wie macht sich d loana?isch härzig das alter momentan,gäll?!

Liebi grüess a ali

schöne guete morge

fraue wiä händers?? lauft wohl grad nüt me do inn.. schad.. :-(

duchty schön fühlsch di so guet und schön gits nomol es maitli!! finds no intressant das keini vo üs es pärli het!!
min fuess isch nonig ganz guet! am morge fühlt er sich fast guet a und am obig tuet er zum teil wieder recht weh!! eifach en tüfelskreis!! irgendwiä schloh i de fuess au immer wieder a oder knicke bitz um bim laufe sit er weh tuet.. wiä verhext!

wünsch eu no en wunderschöne tag!!