Neurodermitis

Hallo ihr Liebe

Kennt sich öber mit Neurodermitis us bi Babys? Und was haltet ihr vo Bioresonanz bim Buschi?
Oder het öber vo euch erfahrig gmacht mit dr Bioresonanz?

Gniesset no das schöne Wätter.

ja leider....
eusi chli tochter hät mit 6 mönet än neurodermitis schub gha, und sich däbii bluätig kratzäd a dä schultärä. jetzt simmer grad amänä zyklus dra vo 30täg behandlig, also 10 täg liächti kortison salbi 10täg füächtigkeit und dän wider 10 täg kortison. ich weiss ä schlönd jetzt warschindlich u viel dhänd überem chopf zämä und dänkäd, hui nei kortison. ich han aber leider scho äs riiisä theater mit dä grossä gha, sie hät erst mit 2 jährig über cho aber sidere kortison behandlig ischäs super bis jetzt.

bioresonaz hani kei ahnig, aber du wirsch jetzt vo allnä siitä warschindlich tipps und triks übercho, was chänti nützä(isch bi eus au so) am schluss muäsch du sälber äntscheidä was sbestä isch, und ich find di chlii hät so glidä da hani nid na lang wellä uf tests oder thermine vo andernä ärtzt wellä wartä.

grüässli

Hallo Peyton

ich weiss nöd, ob du die Siite scho kennsch: http://www.aha.ch/allergiezentrum-schweiz/info-zu-allergien/ekzem-hautreaktion/neurodermitis/?oid=1579&lang=de.

d Sitfig aha setzt sich ganz fescht für Kinder/Babys mit Allergie ii und isch würklich guet. Viellicht cha das ja wiiterhelfe.
Au Dir e schöni Adventszyt und dir und diere Tochter schöni Wienachte
Lisa

Hallo Peyton

So etz chunnsch wirkli Tips über vo allne Orte. Folgendes no zum probiere:

Gang ine Chäserei ond verlang Schotte. Das isch es Abfallprodukt vom Chäse ond mer füetterets normalerwiis de Saue. Macht aber d Huut uf Grund vo de Fett wo drin sind ond de Reschtstoff vo de Milch en megafiini Huut. Hans selber scho probiert. Minere Kollegin ehrne Chind (all 3 hend die Neurodermitis gha!) hets Mega ghulfe. Ond eigentli wenn Nett gnueg bisch gits das Produkt gratis. Pur wies ünerchunsch chli ufwärme zum Bade. Chasch au s Baby demit wäsche. Nüd iicreme danach. S esch gnueg Pfleg ond vor allem Natürlich.

Wege Bioresonanz cha der leider au ke uskonft gäh... :-(

Lg.

Guete Obe

@ Calamita: Oh nei, die armi. Mini Klei het die ganze Ärm bis zum Hals alles voll aber sie tuet sich zum Glück nunig kratze. Ich verstand di das nit länger hesch welle warte. Ich würds au so mache, sobald mini sich tuet kratze wird ich nüm länger warte. Momentan hani e Creme becho vom Kinderarzt ohni kordison, mol luege öb die was bringt. D Mandelcrem het leider nüt oder nur sehr wenig gholfe.

@ Lisa: Nei die Site hani nit kennt. Danke viel mol, do wird ich den in ruhe dri luege.

@ tigerlöwenbaby : Danke füre Tipp. Jetzt muessi mi nur mol ume lose öb mir in dr Umgäbig überhaupt no e Käser hän.

d Bioresonanz möchti ebe go mache zum go luege uf was sie Alergisch chönt si. In dr Regel isch jo e Neurodermitis e verstegti Alergie. Mir hän drum Hünd und ich möcht usschliesse das sie uf die alergisch isch. Mir isch bewusst das me sich nit 100% uf das Ergäbnis söll verloh ich wird den das au mitem Kinderarzt aluege. Aber mini Hoffnig isch immer no das sich das mitem Alter wieder legt...

Wünsch euch e schöni und ruhigi Adventszyt und morn e schöne Niggi Näggi Dag

Guete Obe mitenand

Calamita, hesch du es speziels Wäschpulver für dini Kinder? Wen jo was für eins?

Oder het öber anderschts e gueti erfahrig miteme Pulver gmacht?

No e schöne drite Advänt.

Hallo Peyton, exgüsi voll nid gseh das du namal gschribä häsch.
ich wäschä eusi wösch nur na mit Fileti(flüssig) und tuän kei weichspüäler inä. ich hoffä scho das das öpis bringt mär zahlt ja au grad chli meh für das. und wän öpert anderd na än tipp hät bini also au sehr intressiärt.
wiä gahts dinere muus? gäll jetzt im winter muäsmer na meh ufpassa das nid schnäll trochni huut überchömed.
eusere gahts jetzt grad wider besser sie isch letschti über dä ganz ruggä rot und trochä gsi, händ aber das jetzt wider im griff, isch glaub au ä reaktion vom huästesirup wo sie hät muäsä nä. jetzt hämmer gard wider chli ruäh bi irä däführ fangt di grösser jetzt wider a sich chrazä. aja und namal än tipp mir bi dä grossä hani jetzt grad wider mitäm fenialerg a gfangä das sind tröpfli, das chamer au dä chliinä gäh wäns bist.

schönä abig und schöni fäschttäg