1. Schwangerschaft

Hallo zämä

Bi ganz früsch hie und weiss sit em Mändig dass da i mim Buch was ungloublichs passiert.

Ha am 28.11.2014 d Vorsorgeungersuechig. Heit ihr da eue Partner/Maa scho mitgno?
Wie geits euch eso?

Hach i bi so närvös u chribbelig, es isch no so "unächt" irgendwie u doch gspühri was...

Liebs Grüessli
Sawy88

Liebi Sawy88

Herzlichi Gratulation zum Nachwuchs!!!
Gäll scho no spannend ond speziell. Vor allem wie mer gseht wies wachst.
Üse Sohn esch scho chli älter ond doch eschs, als wärs gester gsi, woni Schwanger gsi bi mit ihm. Am 3. Dez. heimers damals Definitiv gwösst. Also bald scho 2 Jahr her...
Also ich ha min Maa gfragt ob er das möcht mit mitcho. Ech has mir gwünscht au. Nur bi de Herztön lose ond Zuckermesse hani ne vo mir us entbunde. Das isch für mi ned so wichtig gsi. Besprich doch das mit ihm ond leg au dini Wünsch dar. Wärdids ned bereue. Be üs esch gsi dass mer froh gsi send wenn er mitcho esch ond er au het dörfe.
Also nomol gratulation, gniess es ond aues gueti bim 1. Ondersuech.
Lg.

Liebs tigerlöwenbaby

Jööö, danke viel Mal! ja es isch es wunderbars Gfüehl ( o weme sini bräschteli het und sicher nid immer "e Schläck" wird sii).
Chönnti die ganzi Wält umarme
Mi Maa isch sehr gärn derbie heter gmeint gha und i nimene o sehr gärn mit zur Ungersuechig.
Chas chuum erwarte bises sowiit isch.

Wenn heit ihrs de wärdende Groseltere gseit?

Liebs Grüessli und e guete Wuchestart wünschi

Sawy88

Liebi Sawy88

Jöö wie herzig...schön dass sich di Maa freut und au gern mitchonnt...
Also mim Mami hanis scho glii gseit well sie het mitöbercho, wie mer probiert ond ghibblet hend. Sine Eltere hani de Alass vo miner Geburifiir Afangs Februar gno, s aunne zsäge grad. De Zytponkt esch au grad met 13Woche da gsi.
Sie hei ned schlächt gluegt, da mer jo erst a Wiehnachte no verchünnt hei, dass mer im Juni hürate. Aber s hochzyt hemmer äbe scho es Jahr vorher für üs Planet scho. Ond drom esch gmonklet worde, dass mer de wäg dem hürate. Aber loh rede...
Jo s wird der sicher nid emmer guet goh. Aber ech hoffe sbescht für di, dass di Schwangerschaft so richtig chasch gniesse...
Hesch du kei Phase wos dr schlecht isch? De chasch di glöcklech schätze. Mer esch am aafang vel übel gsi. Ond de si au no so bruschtchaschte schmerze cho spöter. Wo sech de chli gsenkt het im buuch so ide 36. Woche hanis do chönne gniesse...
Jede SS esch haut verschiede.
Wenn hesch de Termin? Dröcke dir fest düüme..
Guete Tag ond lg.

Ja är isch ganz füür u flamme u treit mer scho jetz der Wöschchorb id Wöschkuchi abe, Chochet für üs u macht Teeli u am Morge Schnitteli er duet ou scho chli luege für ne grösseri Wohnig, wasi uh härzig finge vo ihm.

oh jöö, die hei sich sicher ou mega mit euch gfreut!

ha scho chli hööchs und tüüüfs... Hüt ischmer rächt guet gange am Morge u am Mittag hani ufs mal irgendwie Buchchrämpf becho und när ischmer gaanz übel worde. ha immer nochli "Brächreiz" aber nid allzu schlimm. süsch geits mer eigentlich rächt guet ussert dassi ab u zue es Brustspanne ha u extrem Müed bi. ah ja und bim Zähnputze hani ir letschti ou chli müeh, wills mi fasch lüpft.

Der Termin isch 17. Juli... i wets äbä ou no nid ds gross verschreie, da ja no so viu cha passiere i dere Zyt.. has scho vo Kolleginne miterläbt u ja wet nid scho ds voreilig si.

Freue mi aber extrem uf Nachwuchs.

Liebs Grüessli und e schöne Tag dir o

Liebi Sawy88

Megaherzig wies gschriebe hesch, wie sich din Maa um di kömmeret. Ond au sich freut uf de Termin am Friitig!
Ech schaffe denn. Werde scho a di dänke dass es guet chond.
So Sache wo du omschriebe hesch, kenni nur zu guet. Hui wenni dra zrugg denke wasi aues probiert ond testet ha, dass die wehwehli wäg gönd...
Aber de Lohn esch unbezahlbar danach. Ond schwupps gohts schnell verbii. Euse chlii Maa lauft etz allei ond das am Liebste de ganz Tag nor no. Esch mängisch stressig so hindenah hösele die ganz zyt.. Wenns Summer wär chonnte mer verrusse die Speli mache. Aber da so chalt scho isch müemer noch höchstens 2 stund ine sust verfrürt er mir. Und de Hund grad mit
Was schaffsch du eigentli? Ich bin dazumal Arbetslos gsi. Han müesse go det. Tja schad, hets ned 3 Monet gliiner iigschlage...
Also ich wünsch der für am friitig toi, toi, toi ond en guete Räste die Woche

Liebi Grüess...

Liebs tigerlöwenbaby

Danke für dini liebi Nachricht!
i schaffe im ne Tourismusbüro u der Arbeitsgeber weiss no nüt dervo u das wetti au so bibhalte bis ds erschte Trimester düre isch.
Oh jööö, das glaubi dass eue chli Maa eim uf trab haltet so süess! ja chind si öppis mega schöns!

Ha rächt es turbolents Weekend gha. am Donnstig hani ganz liechti bruni schmierbluetig übercho, ha denn sofort der Fraueärztin aglüte und si het gmeint solangi kei Schmärze heigi sigs nid schlimm. När am Fritig isch ume guet gsi und am Samstig hani stercheri bruni Schmierbluetige becho... total i panik hani ar Fraueklinik aglüte und bi härä gange (ganzi 5 Stund) hani müesse warte bisi bi dra cho. u när het mer e jungi ärzti gseit gha äs sigi usserhalb vor Gebärmuetter. i bi total fix u fertig gsi und ha nur einisch ghüület. si het gmeint der Oberarzt seu sich das ou no aluege... ei stund speter ischer du cho und het mer d Schwangerschaft ir Gebärmuetter bestätiget. bi gottefroh gsi, ha aber am Mändig ume liechti bruni Bluetige gha und ha wieder mega angscht. ha scho ar Fraueärztin gester ume telefoniert. si het gmeint gha sölls im Aug bhalte. Hüt isch ume weniger, aber bi so verunsicheret. kennsch du das? hesch du das au gha? i bi eifach de sooo froh weni am fritig meh weiss! :-( macht mi rächt fertig.

Merci und au dir e guete räscht vor Wuche.

Liebi Sawy88

Jesses nei. Hesch mi grad chli gschockt met Diner Nachricht. Hoffe de Termin höt esch omso Positiver usgfalle ond s esch nüd schlimms usecho.
Hesch ganz Rächt. Wart s erste Trimester nur ab. Die gsehnd de no früeh gnueg, dass Schwanger bisch.
Ich hans im RAV früeh gnueg müesse säge, wells mer hend welle en Job vermittle wo mit Schwanger sii mitvde Zyt nömm hätt chönne go. Ond 2 Monet vorem Termin hani kener Arbetsbemühige meh müesse mache. Ond die 14 Woche Muetterschaftsgeld hani jo au becho...
Ech drück der Düüme ond wönsch der en guets Wocheändi
Ganz liebi Grüessli...

Liebs tigerlöwenbaby

Leider isch d ungersuechig schlächt usgfalle! Bi grad zimmli düre Wind! D Gynäkologin het bir Ungersuechig zwar e Fruchtblase gseh aber ke Embryo. Mues nägst Wuche nomal ga zeige u de bechumi es Medikament wos när ab geit. Hach bi fescht truurig u für mi isch grad e chliini Wält zämägheit! D Natur het so entschiede u es isch äuä eifach öppis nid ok gsi. Mir gäbe aber nid uf u schöpfe nöii hoffnig für ds nächschte Mal. Liebs Grüessli u dir es schöns Weekend. Glg

Liebi Sawy88

Zerst mol entschildigung dass di ha lo warte. Wiehnachts-Chram...
Es tuet mer onändli Leid was passiert isch ond Dini Wort sind grad guet für di säuber wieder zfah...
Mer esch vor paar Jahre ähnlich gange. Ond ech dänke mängisch Wehmüetig dra zrugg.
Du hesch rächt wenn nid uufgisch. Es werd sin Grund gha ha, dass es het müesse so sii. Üses Läbe beinhaltet veli Prüefige.
Ech hoffe für dich dass gli es chliises Schätzeli darfsch ha ond vel Chraft ond Muet dezue.
Trotzdem e schöni Adventszyt...
Ganz liebi Grüess