Sommer 2010 kinder

Lion gratuliere eu zum lenny, immer wieder es wunder so chlini schätz! Häsch die guet erholt vo de geburt? Schön isch no din ma ume, isch viel wert gäl!

Min chli wots höt wieder wüse, stellt ein unfug nach em andere a und folge isch es fremdwort!
Wie isch da bi euch mit em esse, mine isst immer wieder mal mit de händ obwohl er sehr guet chan mit gabel und löffel ässe!

Lg

Viele Dank, Binchen. Dr Lenny isch jetzt scho ä Wuche alt. Wahnsinnig wie schnäll d Täg verfliege. Ich ha mi eigentlich scho am Tag noch dr Geburt rächt guet gfühlt. Alli wo ins Spitalzimmer cho sin hän gseit, dass me mir gar nit agseht, dass ich erscht grad ä Geburt hinter mir ha!
Aber do deheim wartet denn scho chli d Realität uf eim. Ohni mi Maa würds also noni grad goh. Aber ich dänk es brucht eifach bitz Zyt, bis sich alli an dr neui Ablauf gwöhnt hän!

Bi unserem Grosse isch s Wort NEI au ganz hoch im Kurs. Chasch zum Teil abiete was de willsch, alles isch nei! Grrrrr! Brucht scho viel Geduld!
Das mitem Ässe und em Bsteck goht eigentlich. Eifach mit em Mässer cha är gar noni umgoh. Hän ihm emol welle zeige, wie me öpis cha uf d Gable oder dr Löffel schiebe. Das het är denn lieber mitem Finger druf gschobe!

Lg Lion

hallo

Lion i ha dir zwar au scho gratuliert gha aber i gratuliere eu vo ganzem herze.. Tönt nochere super geburt und schad das din ma nöd het chöne debi si! Schöni zit zu viert wünschi eu!

Min sohn ißt eigentli recht schön.. Natürli gits sache wo au er mite hand ißt wens mite gable nòd so klappet wiäs söll.. Aber im moment stört mi da nonig.. Wird au wieder höre!

Guete Abe mittenand

Melone: het sicher sini vor- aber ou Nachteile wenn er jede Tag so früh dahei isch, oder? Ja isch super mir hei ihr gliche Strass grad e Familie wo ou im Mai 10 es Meiteli becho het! Die Zwo kenne sich auso sodssäge vo Geburt a u chöi mängisch scho fasch nüm höre stürme bis si enand umä gseh u jetzt faht o langsam die Zyt a wo mä sä mau säuber cha zunand schicke für 2-3 Stund, isch mega praktisch.... Het zwüschdüre aber ou Zyte gä wosis nid so hei chönne zäme..... Das kenni ou das sie nachemne Regetag müh het idsschlafe.... Mittlerwilä tueni mängisch scho dinne Schute oder so damit sie müed wird....

Lion: hei schön chöit dir die Zyt ds 4 so richtig gniesse! Ja gäu so ohni Maa chame sich das am Afang nid vorsteuä, isch mir genau glich gange u wo's de sowit isch gsi das er ume het müesse ga schaffe isches o irgendwie gange.... Mä gwöhnt sich dra.... Das mitem Stille het mi am Afang fasch am meiste gstresst....die Grossi het sicher genau denn öppis wöuä oder brucht... I ha de agfange während em Stille mit ihre es Büechli adsluege oder so, denn het sie sich integriert gfühlt und het mir nid d Wohnig unsicher gmacht i derä Zyt

Binchen: oh ja das kenni bestens, sie chönnt ganz guet mit Bsteck esse, aber vo Hand isch eifach besser mi störst ou no nid so. säge scho mängisch du hättsch Gable u Löffu u de nimmt sie's ou für 2-3 Biss, nächer wechslet sie ume..... D Grosseltere störe sich da komischerwiis meh drann, obwohl sie das us minere Sicht gar nüt ageit!

I wünsche euch aune e schöne Abe

Lg

snoopy .. Da chasch lut säge.. Es het viel vor und nachteil das er so frühe de hai isch.. Bevor mir e kind gha hend het er nochem schafe 2stund ruhe gha da i no am schafe gsi bi.. Nocher heter halt da nüm gha wa ihm sehr tschafe gmacht het.. Min sohn het halt mega freud am papi und forderet ihn richtig.. Kei pause für de papi.. Für mi isch guet dasi a termine de chli nöd immer mitschleppe mue! Aber ebe defür redet er halt i alem mit.. Im verglich zu papis wo halt niä ume sind bezw erst de hai sind wend kind im bett sind findis so wiäs bi üs isch glich beßer für de chli! Wichtig isch jo eifach das papis au zit mite kind gnüßed(egal wiäviel si hend) eine wo de hai nume vorem tv/pc sitzed und kei beachtig schenked würi sofort usewerfe!
Hihi tue amel au ball ide wohnig mitem spiele.. Er hät aber au no e auto en scooter und sis laufrad ide wohnig gha zum umefahre und e matraze am bode zum umegumpe!!

Melone da bini ganz mit dir einig dass is wichtig finde dass sie ou öppis vom Papi hei! Das isch mim Ma zum Glück ou sehr wichtig. Er isch zwar nid jede Abe so früh dahei, aber er macht zwüschdüre o frücher Fiirabe und macht am WE sehr viu mit ihre!! Da bini scho dankbar u glich muesi säge bini nid trurig dases nid grad jede Tag so isch
Matratze, dass isch ja e super Idee, das tueni ou grad mau usprobiere! Eigentlich wünschti sie sich es Trampolin, isch mir aber dinne irgendwie doch grad chli gfährlich.... I ha letschti grad es Kegelset kauft, für dinne si sie sehr liecht und wemä se mit Wasser füllt chame se ou guet dusse bruche.... Isch momentan grad der Hit Hmmmm git ja ume es verrägnets Wucheend, da mues mer sich ume öppis la ifaue.....

Guete Morge zäme

Danke vielmol, Melone. Jä, mini Geburt isch wirklich super gsi...und in dr Gschwindigkeit absolut kei Verglich zum erschte Mol. Do gseht me wieder emol, dass jedi SS, jedi Geburt und au jedes Chind total unterschiedlich chöne si. Obwohl me jo scho immer versuecht isch zum alles zvergliche!
Tja, dass mi Maa nit het chöne drbi si, isch wirklich dumm glofe, aber drfür bini mit viele andere Sache belohnt worde: ä schnälli unkomplizierti Geburt und s Stille klappt dasmol plötzlich super! Letschtmol bini wäge däm jo s hülende Eländ gsi!

Hehe, bi uns chunt dr Papi immer am 5i am Obe heim. Und denn isch sofort Spiele mit Papi agseit. Mi Maa cha amigs nit emol rächt d Jacke abzieh. Är nimmt sich denn ganz viel Zyt für si Sohn und ich cha emol öpis anders mache. Während dr SS hani die Zyt natürlich zum liege gnützt! Chönt mr nit vorstelle, wenn mi Maa jede Obe immer erscht am 7i heim würd cho. Isch jo scho toll, wie sich das Papi-Bild in de letschte Johre veränderet het.

Danke Snoopy für dr Tipp mitem Bilderbüechli verzelle während em Stille. Isch ä gueti Idee!
Geschter het mi Maa dr ganzi Tag in d Schuel müesse, denn isch mis Mami zu uns cho choche und dr Grossi cho unterhalte. Bi mega dankbar gsi! Ha sowieso mega Freud ab mim grosse Schätz, är isch soooo lieb mitem Lenny. Wenn ich kurz ufs WC gang, denn passt är uf ihn uf. Und wenn dr Lenny afangt brüele, chunt är mi sofort cho informiere, dass s Baby brüelt. Hihi, als ob ichs nit ghört hät!

Lg Lion

hallo

Snoopy i find da super das din ma au mol frühener firabig macht für familie! I ha au scho a kegel denkt.. Wen da so guet achund werdi da au demnöchst mol kaufe! Danke!

Lion super das damol als viel eifacher glofe isch.. Vorallem mitem stille macht mir au grad chli meh hoffnig..! Hihi.. Den wird din ma genau so in beschlag gnoh wen er hai chund wiä mine! Mue mängisch no mit jagge mitem chline is zimmer go lego spiele! Isch doch so herzig!

Schöne sunntig no

hallo

Wiä gohts eu?
Hànd euri kids au mängisch so "gueti" idee?
Mine het hüt zbsp mir mitere zange in zeche kluppet.. Het sich den entschuldiget und paar küßli druf geh! Frog mi mängisch scho wiäs uf e so e idee chömed!

Lion hender eu scho guet iglebt mitem jüngste familiemitglied?

Min sohn hät hüt dhose abzoge und gseit gaggi putze(het no nüt gmacht gha) ha ihn wöle ufs wc bringe aber er het nöd wöle.. 2min spöter ischs ide windle glandet.. Isch jetzt 2te mol wo er mir da vorer go säge cho isch.. Für mi scho en große erfolg.. Bi so gspannt öb da jetzt würkli e afang si chönti oder doch no id verlängerig goht! Spannend spannend!

Hallo Zusammen

Endlich chumi o umä mau derzue mi ds mäude...irgendwie isch bi üs grad geng öppis los...

Melone das isch doch scho mau es guets Zeiche, dänke das zeigt er daser irgendwie scho möcht! ja gäu wemä mängisch wüsste was i dene Köpf vorgeit üsi het mängisch o so awandlige, hehe. Letschti het si e Filmriife bracht. Sie het der Gartenschluuch id Finger gno, id Öffnig gluegt u gfragt: wie macht me da uf? Im gliche Moment glingt's ihre und sie sprützt sich mitz ids Gsicht

Lion wie geits euch? Heit dir euch guet igläbt? Schön das der Älter so Freud het u d sich so guet kümmeret! Da chönnt me eifach schmeuzä, gäu

So jetzt hoffi uf chli weniger Regen morn....

Lg

oh je grad is gsicht? Wiä hät si reagiert? Mine het bestimmt en schreikrampf und wür in zuekunft en riese boge rundum mache!

Er het wider ufghört säge wen er gagi mue.. I denke wil er verstande het das er den ufs wc mue.. Paßt ihm wohl nöd grad..

Hallo zäme

Judihui...cha mr emol e paar Minute Zyt näh zum Schriebe. Chum im Momänt ächt zu nit viel. Überall hets Sache, wo ich sött erledige. Aber näbst dr Betreuig vo mim Grosse, wet dr Lenny am liebschte bi mir si. Är isch im Gegeteil zum grosse Brueder ä richtige Tragling. Einersits gniess ich die Nöhchi sehr, anderersits chumi eifach zu nüt. Zum Glück luegt am Obe mi Maa, damit ich wenigstens bitz öpis cha erledige! Suscht sin aber beidi Buebe richtigi Schätz! Mi Grosse het viel Verständnis, bringt mr Sache für dr Lenny oder passt mol kurz ufs Baby uf, wenn ich schnäll öpis wet mache. Är folgt mir au guet, wenn mir unterwägs sin. Do bini sehr froh!

Hehe...luschtigi Idee het är au mängisch. Het mit eme Farbstift bitz an dr Wand kritzlet. Und wo ihn s Grossmami gfrogt het, wär das gmacht het, antwortet är: Das isch dänk dr Papi gsi!!!

Lg Lion

hoi zäme

Wiä gohts eu?

Lion da tönt jo super mit dine jungs und wiä de groß für de chli lueget! Oh je de papi wohl de armi i dere gschicht.. Herzig!

Bi hüt ide 3johres kontrolle gsi mitem chline(2mönet vor sim geburi).. 15kg 98cm er isch so gwachse.. Und wegem rede het si au gluegt.. Si merkt zwar e entwicklig aber si verstoht ihn nume wen si weiß um wa das goht.. Findi kraß diä ussag da er würkli dütlicher als no vor paar mönet redet.. Naja.. Si meldet ihn jetzt a fürd logopädi wo bis im summer go cha bis mir termin überchömed.. Bi echt gspannt wa diä säget!

Schöns wuchenend no

Guete Abe mitenand

Melone ja aber mits ids Gsicht, hihi...sie het zu üsere Überraschig chönne lache ha eigentlich ou es Gschrei erwartet.... I würd mi a dire Steu nid ds fest la stresse wägem ufs WC ga, das chunnt de ganz plötzlich dänki! Bi üsere isches ja plötzlich ou ganz schnäu gange. Mir hei im Fau gar ke 3Jahreskontrolle, ersch mit vieri wider... Isch mängisch scho komisch...was meint sie de, nume wägem undütlich rede oder was? Isch doch mängisch ou eifach schwierig, de isch mä amene frömde Ort u e frömdi Person erwartet so viu vo ihne. Üsi isch de meistens nämlich gar nid gsprächig obwohl sie süsch plapperet wie nes Buch.... Wie gsehts eigentlich bi dir us wäg dire Operation? Hesch endlich e Termin übercho?

Lion78 schön geits euch gut! Gäu isch soo viu Wert we die Große so guet mitmache! Das kenni nur zu guet, am Afang wo der Chli isch uf d Wäut cho bini eifach zu gar nüt me cho :-( ha ds Gfühl gha bi nume no drann u glich nie fertig.... Und de plötzlich fasch vo eim Tag ufä ander hani irgendwie umä meh Luft gha. Mittlerwilä chani umä Hushaute ou wenn die zwöi wach si u meistens sogar i Ruhe koche-)

I möcht jetzt eeeeeeeeendlich Summmmmmmmmer!!!!

E schöne Abe auersits-)

snoopy.. super het si drüber lache chöne! I mach kein streß mitem ufs wc go.. Het halt eifach freud.. Er lauft de ganz morge ohni windle ume wil aber nöd uf de hafe/wc! Naja..
Mir hetet au kei 3johres kontrolle isch wohl me gsi zum luege wegem rede.. Jo wegem schnell rede und als anenand und loht paar buechstabe us wiä r und l wa si vor 3mönet no als normal empfunde het und si verstoht ihn nume wen si weiß um wa das goht.. Ha grad gest mit dere vo de krippe gred(min sohn isch erst e paar mol gsi) und si findets au übertriebe.. Si verstoht ihn jo au.. Diä seged wahnsinnig streng worde isch ihri mainig den gsi! I warte ebe druf das sich mol öper meldet zum termin mache.. Mühesam min ma mueßes au endli wüße zum frei mache.. Chan mer au nöd vo hüt uf morn sowieso jetzt wo den ali feriä händ!