Lilii's Gruppe: 2 Kinder oder am üben...

So, hie isch d Fortsetzig fu "bereit fürs 2te-klappe die zwote.."

Hey ihr, i han mi au do agmolde....
Lilii, i gratuliere dir zu dinere süesse prinzessin samira! Hoffe eui gohts guet?
Mir sind fest am hibble, söt am weekend oder spötischtens mentig mini TR becho.... I hoffes so fest, aber will irgendwie nid zfest dra glaube, nid das i sfest entüscht bin!
I han eifoch es rechts spanne am rechte unterbuuch, weiss au das i im rechte eierstock es ei gha han wo gsprunge isch....
Mol luege, i hoffe und bete so sehr....
Schöni ostere eui! Grüessli

Danke lilli bin im bc go luege und han eu so gfunde! Danke für de tread ! Wünsche eu no ganz schöni ostere !

Hallöchen

Sodeli bi jetzt o hie agmäldet, lilii danke fürs eröffne vo üsem thread!

Morn hei mir ET! bi mega gspannt we üses bebeli wet ufd wält cho. hüt hani mega müeh ka mit loufe u sitze, sehr unagnäm!

häbet no e schöne abe u gniesset d ostere

hey

kalaku, ha scho dänkt dis baby sigi daa, will ich länger nüt gläsä ha fu dier! Demfall drück ich dier Duume dass es gligli losghat! Villicht gits ja au es Terminbaby wie bi mier??

Melni, ville Dank für d Glückwünsch. Uiii ich drucke dier soooooooooo fescht Dume!!!! Söll doch bi dier ändlich au klappe!!!!

Hallihallo zäme,e wär ou do
Lilii schriibe mer öis jezt nome no do?????wär jo chli müehsam duurend hin ond här z wächsle.
Schöni Ostere euch aune

Hey

So i be au do-;) I denk au wär gschider mer schriebed do weiter.

Uhh KaLaKu du machsch esch spannend! Wünsch dir alles gueti für Geburt!

Grüssli

Hallo ladies

Bin au da Danke für s'Eröffne, lilii.

Eus gahts guet, gibe mir Müeh jetzt wieder echli meh z'schriebe. Sg_mami, ich drucke dir Duume, dass die drü Mönet ganz schnell umegönd, isch frustrierend. Dänke lieb a dich!

Melni, schön vo dir z'läse! Mini Düüme sind sowas vo druckt für dich!! Muen luege, dassi s'Osternestli für min Grosse au mit druckte Düüme verstecke chan

Lilii, häsch du au scho Kia gha mit dinere Chline? Ich bin letscht Mo gsi. Alles i.o. sowit. Er hät eifach bizzeli zwenig zuegno. Jetzt mueni 24h Protokoll füehre und nächste Di namal verbi. Er isch ebe au immer no gelb. Sie hät gmeint, ich söll nöd i zvill Lüüt gah mit ihm, da er so absolut kei Reserve heg und's doch no vill Vire umehegi. Und ich selber dörfi au nöd immer umehüehnere (wäg dä Milch) zzzz.... schwierig, wobi sit i zwei han, bini scho weniger unterwegs. Hoffe das pendlet sich alles bald i!!

Rose, wie gahts mitem Schlaf vo dä Chline? Hoffe besser! Han znacht bim Stille immer a dich dänkt und mi gfrögt, öb du echt au wieder am Kämpfe bisch isch ja au streng mit so wenig Stunde anenand Schlaf und dickem Buuch!!

Allne schöni Ostere!

ja finds guet wemmr nur nu da schribet, isch schusch scho chli müehsam.

Ich bi hüt äääändlich mal am Büro ruume. ha sit monate kei ornig meh gmacht i allne rächnige und papierkram und jetzt hani gfunde also das Puff chömmr so nit zügle... D stüürerklärig muss au nu uf post...

ja di stillerei ide nacht... mösst nit sii...

schöni ostere!!!

hallo fraue,

chume au mal de zue zum mich mälde. sind ebe no bi mine eltere bis morn.

@melni, mini duume sind fescht druckt für dich.

@lilii, danke dier fürs eröffne. ich hoffe hesch dis büro guet chöne in ordnig bringe.

@kalaku, macht dis chline immer no nöd ufe wäg?

@minimii, super gahts dier guet. mit de leona gahts relativ guet. gib ihre jetzt am abe immer schlafchügeli gäge schlafstörige. vom do ufe fr isch sie wieder vom 3 ä weg wach gsi. letscht nacht het sie sowieso bi eus gschlafe. am 5-i het sie zwar brüellet gha, han sie de usem bettli gna und zu eus inne gna. so het sie no einisch ä chli gschlafe.

gester namittag han ich so buuchweh gha, relativ wiit unde. mis mami het de gmeint gha, dass siget sänkwehe. die han ich ebe bi de leona fascht nöd gspürt gha. mis mami het de gmeint gha eifach nöd dra dänke, de gahts de scho. ha ha ha isch ja voll eifach.

so wünsche euch en schöne abe und en nöd allzu churzi nacht. wäg de ziitumstellig.
morn ganz schöni ostere.

grüessli maria

hoi rose

Ich ha au nur ide 2. SS senkwehe gspürt, öpe ide 33iste wuche. Bi mier isch dr Buch hert worde und es het en sehr starke druck gäg abe gä, also wie wenn öper wur ds baby abedrücke oder wenn öper gwicht a gebärmueter ghänkt hätti. ha das so 3-4täg gha. (d hebamme het au gseit sänkwehe gienget so 3-4 täg und denn isches verbi).

Mis bürozüg isch eingermasse i ordnig, bi nu nit ganz fertig. mier hend ja keis büro-zimmer meh, drum isch immer alles ide chuchi umäglägä und bim liam im zimmer. also puff überall. aber das änderet sich ja gli

wyschä nu en guete ostertag trotz sibirischer chälti und gueti nächt!

hoi lilii,

bin froh wänn ich de senkwehe dure han. aber ich glaube es gaht würklich am ändi zue, mit däne.

so ostere sind dure. morn faht de alltag wieder a. bi euch sicher au?
han morn namittag no hebammegspröch. bin gspannt druf.

allne en schöne abe. grüessli

Hallo Fraue

Melni, gits scho News???

Rose, sind d'Senkwehe überstande? Bi dä Lilii sind's doch dazumal au "nur" drü vier Täg gange, wänni mi recht erinnere mag. Freut mi, dass d'Leona echli besser schlaft. Han grad mal e Frag: Sind die Chügeli nur für Durchschlafproblem oder echt au für Ischlafproblem? Und welli häsch du gnau, similasan? Dä Nevio schlaft sooooo schlecht i am Abig in letschter Ziit und ich han so schlechti Nerve. Freue mi amel so uf eis zwei Stündli Rueh am Abig für mich und siteme Wiili hani au die nüm, will er eifach immer bis fascht am halbi 10i brucht, bis er ischlaft. Er isch zwar u brav, liegt eifach im Bettli und wartet bis s'Sandmännli chunnt sozsäge, keis Ufstah, keis Umeschwätze, aber eifach eeeewig. Und ich dörf jaaaa nöd mini Hand vo sim Buuch wägnäh, dänn gits grad Gschrei. Glaube er hät richtigi Verlustängst bim Ischlafe. Verstahne ihn scho, aber müehsam isch es trotzdem für mich.

Hüt hani namal Kia mitem Chline. Nimmt mi wunder, wie er zuegno hät..... han mir nach langem Hin und Her jetzt igestande, dassi ufhöre mit Stille. Es macht mich echt fertig, die Stillerei und es isch kein Deut besser worde i däne fascht sechs Wuche. Mini Schwiegi hät gester scho zu mir gseit, ich gsechi so schlecht us, heg ganz truurigi Auge, öbi echt postnatali Depressione hegi. Finde das chas echt nöd si und ziehne jetzt en Schlussstrich. Han nur au kei Ahnig, wiemer abstillt Aber ebe, han ja hüt Kia.

Lilii, wie gahts dinere chline Prinzessin? Und dir? Hät's guet klappet di erste Täg elei oder bisch doch au mängisch echli am Rotiere? Schöne Ticker häsch du! Mueni au mal no mache....

Kalaku, bisch du no mit Kugelbuuch unterwägs? Dänke oft a dich und wänn echt dä Moment da isch.....

Wünsche eui en guete Wuchestart! Muen no dä Hizgi vom Chline verwünsche und dänn ab unter d'Duschi

guete morge minimii,

so einigermasse han ich senkwehe überstande. ich hoffs zumindest.

ja han chügeli vo similasan. ich gibe de leona 2-3 stund bevor sie is bett gahts all stund 4 chügeli. die sind sicher au guet zum ischlafe. probiers einisch, schade tüends sicher nöd. dass glaub ich dier, dass es sträng isch, wänn fascht nöd zur ruhe chunsch.

wägem abstille; ich han bi de leona tee trunke. am morge ä tasse salbeitee und am namittag ä tasse pfeffermünztee. nach einer wuche han ichs dure gha. guet han au nur no wenig milch gha. du wirsch öpe no chli meh ha.

ich hoffe chunsch wieder guet uf bei.
grüessli maria

guete morge

minimii, finds guet dass dich entschide hesch, gaht dr nah sicher besser. Chasch au viburgolzäpfli gä zum ischlafe, die sind au pflanzlich. Das isch müehsam wenn nit amal am abig meh chli zit fir dich hesch.
Bi ys laufts guet, di chli isch sehr agnähm, het eifach nachem stille oft Buchchrämpfli, aber wenigstens weissi was es isch und beinli chreise hilft und die nacht isch sie chli oft cho. Dr Liam isch superhärzig zu ire, gester het si brüelet nachem badä will sie hunger gha het und de bini mit ihre ufs sofä anägsässä und de isch de liam scho cho und het ire es auto bracht zum spile... soooo süess!!
Dr alltag gaht rächt guet, dr Liam spilt extrem oft älläi, total fridlich, ha ds gfühl er het en riise Entwickligssprung gmacht sit sie uf dr wält isch!
ich ha inere wuche artztermin mit de chline.

Kalaku, du hesch dis baby sicher scho bi dier oder??

So, hüt isch dr liam ja ide chrippe und ich muss tonnewiis waar ga enzorge! S git doch nu einiges zum organisiere und mache bevor dr gross zügeltag chunt!
Di Chlii isch jetzt au wieder igschlafe, also heisst fir mich au ab unter die Dusche! Schenä Tag!!