BL / BS

Hallo Mamis us BL oder BS

Ha denkt i eröffne für uns au e Regionalthread

Hoii Iscmesse,
Danke fürs eröffne!
ich chume vo BL und du?
Gratuliere zu dim Schätzli, wie alt ischs den? Lg

Hallo Honey

Bi au vom BL Mini Tochter isch am 5.2.13 ufd Welt cho. Dins?

Jö, und isch d Geburt und Kennelernzytt bi guet verloffe? Wie gohts eu so?
Min Sohn isch im Juni 2012 ufd Welt cho

hallo zämme
bi au usem BL. mi sohn isch im august 2012 ufd wält cho.
iscmesse denn gratulier ich dir no ganz härzlich zu dim chleine töchterli. isch und goht alles guet?
lg

Hoii chroettli! Woher bisch de vom BL weni froge dörf? isch u klappet alles guet mit dim chliine maa? Und wie alt sid ihr? het öpper vo eu au im Bruederholz entbunde? Lg

ich bi z oberwil deheim und du?
jo lauft alles beschtens. isch e richtige goldschatz.
bi im bethesda gsi.
bi euch lauft alles guet?

Hoi Zämme

D Geburt isch super verloffe, ha praktisch keini Schmerze gha und sisch mega schön gsi. D Kennelernzyt isch wie immer halt es uf und ab gsi, bi am Ahfang recht überforderet gsi mit allem aber mittlerwiile gohts recht guet. Sie schreit nümm so viel wie au scho und schloft in dr Nacht au besser

I bi 23 und ebefalls vo Oberwil ;) Ha z Liestel im Kantonsspital entbunde, mini FA isch dört.

Was hender so plant an dem Wuchenend? Weiss gar nit wie s Wetter isch.. Me wird langsam Ideelos was me bi dem Wetter no alles mache chönnt.

Liebi Grüess!

@ chroettli, ich bin z Muttenz daheim, ja bi uns isch alles Tiptop, usser dass min chliine Schatz grad sini erschti Verchältig duuremacht :-( grad chli heftig mit schnupf, Fieber, Hueschte u allem drum und daa.. Ich hoff dass das jetzt bald verbii goht den chrücht er wider zfriede i dr Wohnig umme

@ iscmesse,ich bin 24
Hey schön dass das bi dir so supper gange isch bi dr Geburt, aber Wooww praktisch keini Schmerze??? Wie hesch das gmacht? Hesch en PDA kha demfall? Ich bin schöön 13 stund i de Wehe glääge :-/ aber denn isch au alles suppi gange..
Puuuh also das mitem viele Schreie kenni sehr guet, üse Bueb het bis 5 Monet all Obig richtig schlimmi Schreiphase kha und immer öppe e Stund lang, han drum au nit viel chönne unterneh mit ihm. han alles probiert kha an craniotherapie / Ostheopatie und züg und Sache :-/ S het sich den aber vo sälber gleggt. Aber s schlofe isch immer no en Prozäss..
Am Samschtig hämmer eig. Vor kha is Zolli go mitem chliine, - d.h wenn er wider fit isch.
I Glaub bis dänn hämmer no kei Früehlig :-/

Honey, vori hani au z Muttenz gwoht gha bevori uf Oberwil cho bi ;) Oje, de Arm, gohtsem jetzt wieder chli besser?

Jo ha e PDA gha. Es het müsse ihgleitet werde 3 Tag vor ET, willi e zhoche Bluetdruck gha ha. Insgesamt hani ca. 1 Std. lang wirklich Schmerze gha, schusch nur sone Druck nach unde. S Presse isch denn au überhaupt nit schmerzhaft gsi. D PDA legge hani am Schlimmschte gfunde, die het mr mega weh do

Ach das Schreie... Ebe, mittlerwiile ischs wirkli besser. Isch aber immer schön vo öpperem z läse, wo s gliche duremacht oder duregmacht het, denn fühlt me sich nit so ellei.

Oh schön in Zolli.. Guet, bi dem Wetter wirdsch wohrschins weniger Lüt ha, isch doch au was. Und solangs nit rägnet findi isch das doch super.

Hallo zäme

Bi grad per Zuefall uf dä neui Thread gstosse. Wo ich amigs bi "Mamis us...." gluegt ha, isch no nüt vo BL/BS dinne gsi. Und siehe da....do sin dr plötzlich! Hihi!

Iscmesse, mir hän jo au scho zäme gschriebe. . Bi froh, dass es dinere Muus bitz besser goht und du chasch ruhiger mit dr Situation umgoh!
Do ich damals gläse ha, dass du ins Kantonsspital Liestal gohsch goh gebäre, bin ich überzügt gsi, dass du neume vo dere Region chunsch. Jetzt hani aber gläse, dass du vo Oberwil bisch!
Und du Chroettli au! Ich wohn nämlich au in Oberwil!!! Wie chlei d Wält doch isch!
No kurz zu mir: Ich ha im Juni 2010 mi erschte Sohn im Bethesda gebore und erwart jetzt in zwei Wuche mi zweite Sohn. Ich gang au dasmol wieder ins Bethesda, do ich dört mi Frauearzt cha mitnäh! Letscht Mol hani bitz schlächti Erfahrig gmacht im Wuchebett bezüglich stille. Sie hän enorme Druck gmacht und obwohls nit gange isch, hän sie ihm weder Tee geschweige denn ä Schoppe welle gäh. Bi nur no s hülende Eländ gsi!
Dasmol hani mir gschwore, dass mir niemerts me Vorschrifte muess mache. Ha vorsichtshalber s Milchpulver und d Schöppeli in mi Köfferli packt!
Wie hän dir dä Stilldruck so erläbt? Oder hets bi euch grad super klappt?

Honey12, ich wünsch dim Sohn ganz gueti Besserig. Mine het grad ä schlimmi Magedarmgrippe hinter sich!

Liebi Griessli, Lion

Haha Lion, wie cool, du bisch au vo Oberwil Ui in 2 Wuche, so toll. Ha gester mim Maa grad gseit, wie sehr i doch dr Buuch und d Bewegige vo ihre inne vermiss.. Er het denn nur afo spinne vo wege er will kei Zweits und so :D (hani jo gar nit gseit...) Vom Bethesda hani bis jetzt gueti Sache ghört Das mitem Stilldruck kenni leider.. Bi mir hend sie au mega Druck gmacht und i bi psychisch weg dem am Endi gsi. Es het mr so dermasse weh do und i ha denn mittlerwiile mega Panik gha vorem nechschte Stille, willi so Angscht vorem Schmerz gha ha. Irgendwenn hani mi Muet zämmegno und dr Stillberoterin mini Meinig gseit und gseit gha, sie söll mr uf dr Stell s Medi zum Abstille geh schusch dreihi dure do! S het denn funktioniert und ab denn ha au i s Wuchebett chönne gniesse.
Klar, mengmol hani scho z Gfühl i haltere öppis vor wenni ihre eifach nur dr Schoppe geh, aber i bi insgesamt sehr glücklich mit dere Situation und würds wieder so mache.
Hesch denn noher gstillt oder au mit Schöppele witergfahre? Willsches bim zweite Sohn wieder probiere mit Stille?

Gäll Iscmesse isch mega cool, dass mir jetzt beidi vo Oberwil chöme!
Ich schrieb dir spöter zrugg...finds sehr interessant mi do drüber z ustusche! Aber mini Männer chöme jetzt denn vom Spaziergang zrugg und ich sött goh choche!
Bis spöter...freu mi druf! Lion

Am Schluss wohne mir Oberwilerinne no im gliche Quartier.. I würd jo lache ;)

Hallo zäme

Uiui, ich chum au ändlich wieder zum schriebe!
Hän geschter nochem Mittag no "kurz" ins Dütsche welle goh e paar Babyutensilie kaufe, was gmacht isch vor dr Geburt bini froh. Aber denn sin mr insgesamt öpe zwei Stund im Stau gstande und im Marktkauf hani mini erschte Sänkwehe becho!
Puhhh, jetzt weiss ich wieder wie sich Wehe afühle, me vergissts jo so schnäll! Uf jede Fall sin mr denn mega spot heimcho und ich bi nur no ab ins Bett ghuscht!

Hihi Iscmesse, ha grad müesse schmunzle ab em Kommentar vo dim Maa wäg eme zweite Chind. Ich glaub die meischte Männer bruche do viel me Zyt als d Fraue, bis sie sich ä Zweits chöne vorstelle. Aber das chunt denn mit dr Zyt scho. Es isch halt für d Männer scho chli anderscht. So richtig real wirds erscht, wenn die Babys denn do sin und mir gspüre se scho soooo lang im Buuch. Finds au ganz öpis schöns und speziells. Usser är druckt mr sis Fudi grad in d Rippe ine!

Gäll isch mega schad, dass sie eim so stresse mit däm Stille! Me isch so unter Druck, dass me sis Baby gar nit richtig cha gniesse! Um so töller, wenns eifach grad guet klappt. Mi Frauearzt het grad letscht Mol gseit, dass alli Fraue wo är brüelend im Wuchebett atrifft, alli Problem mitem Stille hän!
Ich bewundere di, dass du dr Muet gha hesch dini Meinig zsage. Dä Muet het mir leider gfehlt. Ich ha mi denn druequält mit stille, abpumpe und nocheschöppele! 13 Tag noch dr Geburt het dr Chlei aber s Geburtsgwicht immer noni erreicht gha (au dr Milchischuss hani noni gha) und d Stillberoterin het gseit, mir sölle doch goh Milchpulver kaufe. E Monet lang hani no abpumpt und parallel Muettermilch und Pulvermilch gäh. Bis bim Abpumpe nur no e paar Tropfe cho sin. Denn hanis eifach lo si! Dr Chlei het eh nie grosses Interässe gha an dere Bruscht, vo Afang a nit! Nochär isches mir wieder guet gange!

Bim zweite Baby versuech ichs ganz für mi ellei mitem Stille! Es muess mr niemerts cho Tipps gäh. Wenn är Interässe zeigt und sälber wet suuge, denn probier ichs nomol! Wenn ich aber merk, dass es glich isch wie bim erschte Mol, verlang ich d Abstilltablette. Das Theater mach ich nüme mit! Ha das mit mim Arzt und mit minere Hebamme besproche und sie unterstütze mi in minere Entscheidig voll und ganz!

Ich wohn übrigens z Oberwil ganz in dr Nöhchi vom Friedhof, vorem Wald wos in Richtig Biel-Bänke goht! Wohne erscht sit eme halbe Johr do. Hän vorhär unterhalb vo dr Ziegelei gwohnt. Ufgwachse bin ich in Bottmige! Und ihr?
Sorry für dr Roman!!! Lg Lion