Samichlaus-Gedichte mit mehreren Strophen

Immer bi-ba-bubi-brav

S'Mami meint, es wäri schön,
wenn ich e chli braver wär.
Samichlaus, ich säg der eis,
brav sii isch de öppe schwär.

Immer bi-ba-bubi-brav
gnau so wienes Schaf.
Nei, so chni gar nöd sii,
Samichlaus, das gsesch doch ii!

Au wenn s'Mami schimpft
und de Papi d'Wänd ufgaht,
bitte, bring mer glich es Gschänk.
Bi suscht gtruurig - s?wär doch schaad.

Ich ghöre öppis lüte

Ich ghöre öppis lüte
was chönnti ächt das sii?
Ich stah ganz still und warte,
de Samichlaus chunnt Türe ie.

Au wenn ich nöd immer lieb bi gsi
Samichlaus, das isch verbii.
Vo jetzt a will ich s besser mache,
nöd immer striete, zwängele, krache.

Zum Schluss gib ich dir d Hand
und du gasch wiiter vo Land zu Land.
Viel z schnäll gaht so en Tag verbii,
zrugg bliebt no lang en wunderbare Schii.

Warum häsch du kei Frau?

Chlaus us dir da wird i nöd schlau,
säg, warum häsch du kein Frau?
So als schöne, guete Maa
wirsch du wohl au Bedürfnis ha!

Wer hilft dir bim Gritibänze bache?
MIt wem chasch du brüeli oder lache?
Wer wartet uf dich und hilft dir us em Gwand?
Wer chrauled din Bart und strichled dini Hand?

Wer bespricht dini Sorge mir dir am Tisch?
Wer nimmt dich in Arm, wenn du truurig bisch?
Weisch ich mögt dir das so gönne,
wenn dich e Frau würd verwöhne.
(Aus "De Samichlaus findet's en Hit")

Vo wiit her us em dunkle Wald

Vo wiit her us em dunkle Wald
chunnt de Samichlaus jetzt bald.
Er isch scho fliissig dra am Ruete binde
und am Bache für die brave Chinder.

Ja, er hät s streng, de armi Ma
zum Glück sind d Wienachtsengel da.
Sie tünd em d Nüss in Sack iepacke,
Öpfel, Bisquit und andri gueti Sache.

Und jetzt isch er da, de bravi Ma.
Ich hoff, er laht mer öppis da,
es müest nöd grad e Ruete si,
s dörf au öppis Bessers si.

---