Samichlaus-Gedichte mit mehreren Strophen

Sami, Niggi-Näggi

Sami, Niggi-Näggi,
Hinder em Ofe stek i.
Gib mer Nüss und Bire,
De chumen i wider füre.

Sami, Niggi-Näggi,
Hesch e Bart wi üsen Ätti,
Hesch e Sack voll Plunder,
Öpfel, Nuss u Schoggi drunter.

Samichlaus, du alte Gsell,
chauf mer doch es Velo-Gstell.
D Redli will i sälber zahle,
Chasch de au mitem ume chare.

Dich, Samichlaus, cha niemer ersetzte.

Für vieles stellt mer hüt Roboter a,
mer seit ohni Computer chas nöd gah.
Es git Raggete und Satellite,
und doch wird uf de Erde immer no gschtritte.

Mer schafft vieles ab und tuet ume hetzte,
nur dich, Samichlaus, cha niemer ersetzte.
Du lasch dich nöd vom Moderne la leite,
und läbigi Schmutzli tüend dich begleite.

Ziesch all Jahr z'Fuess dur euses Land,
treisch immer s'rot und goldig Gwand,
für jedi Familie häsch Zit und machsch halt.
Ich danke dir im Name vo jung und alt.

Ich bin e chline Stumpe

Ich bi en chline Stumpe,
tue gärn chli umegumpe,
ä Lumpeornig mache
mit mine viele Sache.

Tue mängsmol gar nid lose,
ha Fläcke a de Hose,
tue vielmol umestoh
statt weidli hei-zue goh.

Doch darfsch du s Mueti froge,
ich tue keis Tierli ploge.
Drum Chlaus bis so en Guete,
verschon mi vor de Ruete!

Bring doch nur gueti Sache,
wie tätsch du Freud mir mache!
Und gäll, säb weisch sit färn,
i ha mis Mueti gärn!

---